"MA KOJI HOLLYWOOD? MOJ SPLIT JE BIJA HOLLYWOOD!"
Ko je bija sritan ka ja pa da je s ponistre svoje sobe moga usrid noći gledat kako veliki Smoje i Ona pravidu krugove priko Rive, điravaju, i to sve na nekih dvadesetak metri od moje posteje ? Od Đige do Matejuške pa nazad, i tako stotine puti. Po uru, dvi vrimena bi ih pratija u stopu, i to s glavon na kušinu, okrenut prema prozoru. Smoje je uvik priko ramena nosija nekakvu staru boršu, u ustima bi čuča španjulet, a ruke bi drža na gujici. Ona bi ga pratila i ništo mu žvelto tumačila rukan. Uvik ista slika, svaku večer, od ponoć do jedan oli dva bota. To su bili moji prvi “bliski” susreti s velikin književnikon, oli kako bi on više volija reć, publiciston. Ma da mi je bilo bit tu blizu njih pa čut o čemu to oni pričaju, ča to Ona maše rukan, ča on stalno muči a ona ka navijena govori. Mislija san; kad odrasten upoznat ću se s njin... i ja ću doli priko Rive šetat pokraj njega, raspravjat ćemo o važnin stvarima; o politici, balunu, o Malon Marinku, o librima... Ta mi se želja nika...